Undarleg framsetning

Mér finnst það dálítið undarlegt að verið sé að tengja sérstaklega viðurstyggilegt kynferðisbrot eins einstaklings við Bahá'í samfélagið á Íslandi. Menn myndu væntanlega reka upp stór augu ef allir þeir sem skráðir eru í þjóðkirkjuna og hafa framið slík brot væru tengdir sérstaklega við hana. En þessi einstaklingur sem verið er að vísa í þarna hefur aldrei verið virkur í bahá'í samfélagslífi né komið nálægt starfsemi á vegum þess. Hann misnotaði hins vegar barnunga dóttur sína og þurfti sem betur fer að svara fyrir gerðir sínar fyrir dómi.

Eðlilega finnst mér leiðinlegt þegar verið er að tengja svona við bahá'í samfélagið hérna sérstaklega þar sem innan þess ríkir mjög hreinskiptin og afdráttarlaus andstaða gegn þöggun og þess háttar.

Þessi frétt er nú sett fram í tengslum við það að fagráð á vegum innanríkisráðuneytisins kallaði eftir upplýsingum frá trúfélögum um það hvernig þau bregðast við kynferðisbrotum. Ég leyfi mér að birta hér brot úr svari Þjóðarráðs bahá'ía á Íslandi til fagráðsins, en fréttamenn eru einmitt með öll þessi gögn undir hendi:

"Ágæta fagráð

Erindi ykkar varðandi hugsanleg ofbeldisbrot og einkum kynferðisafbrot innan trúfélagsins var tekið fyrir á fundi Andlegs þjóðarráðs bahá’ía á Íslandi á síðasta fundi þess dagana 16.-17. júlí síðastliðinn.

Erindið sem og umfjöllun um þessi mál undanfarin misseri bera þess nokkur merki að trúfélög séu álitin einhvers konar ríki í ríkinu sem lúti eigin lögmálum jafnvel óháð almennum lögum hins ytra samfélags. Það er því nauðsynlegt að það komi skýrt fram að samkvæmt lögum bahá’í trúarinnar ber bahá’íum að lúta landslögum undanbragðalaust. Öllum málum sem lúta að lögbrotum bahá’ía ætti þar af leiðandi að beina í réttan farveg hjá hinu opinbera og ekki ætti að hafa afskipti af vinnslu mála á þeim vettvangi. Þöggun eða tilraunir til að breiða yfir lögbrot gengju þannig gegn hugmyndum bahá’í trúarinnar um eðlilegan framgang réttvísinnar."

Kynferðisbrot tilkynnt hjá 5 trúfélögum